ខេត្ត​ព្រះសីហនុ៖ ឯកឧត្តម យន្ត មីន អភិបាល​នៃ​គណៈ​អភិបាលខេត្ត​ព្រះសីហនុ បាន​ដឹកនាំ​គណៈប្រតិភូ​ខេត្ត​ចំនួន ០៨ រូប ទៅ​ចូលរួម​ពិធីបុណ្យ​ផ្កា​រីក​របស់​ទីក្រុង​គូ​រី (Guri Cosmos Festival 2017) ចាប់ពី​ថ្ងៃទី២១ – ២៥ ខែកញ្ញា ឆ្នាំ២០១៧ កន្លងទៅនេះ។ ដំណើរ​ទស្សនៈកិច្ច​នេះ​ ត្រូវបាន​ធ្វើឡើង​តប​តាម​ការអញ្ជើញ​របស់​សាលាក្រុង​គូ​រី នៃ​សាធារណរដ្ឋ​នៃ​ប្រទេស​កូរ៉េខាងត្បូង ។

យោងតាម​ប្រភព​ដែល​បាន​បង្ហោះ​នៅលើ​ទំ​ព័​រ facebook របស់​រដ្ឋបាលខេត្ត​ព្រះសីហនុ​បានអោយដឹងថា៖ ក្នុង​ដំណើរ​ទស្សនកិច្ច​នេះ​ ភាគី​ទាំងពីរ(ក្រុងព្រះសីហនុ​និង​ក្រុង​គូ​រី) បាន​ជួបពិភាក្សា​អំពី​ការបង្កើត​ចំណង​សម្ព័ន្ធមេត្រីភាព ​រវាង​ខេត្ត​ព្រះសីហនុ និង​ទីក្រុង​គូ​រី។

ជា​លទ្ធផល​ភាគី​ទាំងពីរ​ បាន​ឈានដល់​ការងារ​សម្រេច​និង​ចុះហត្ថលេខា​លើ​កំណត់ហេតុ ស្តីពី​ការបង្កើត​ទំនាក់ទំនង​មិត្តភាព និង​កិច្ចសហប្រតិបត្តិការ​រ​វាង​ខេត្ត-ក្រុង​ទាំងពីរ នៅ​ថ្ងៃទី២២ ខែកញ្ញា ឆ្នាំ២០១៧កន្លងទៅថ្មីៗនេះ កិច្ចសហប្រតិបត្តិការ​នេះ​រួមមាន​លើ​វិស័យសេដ្ឋកិច្ច វប្បធម៌ ទេសចរណ៍ អប់រំ កីឡា និង​ការគាំទ្រ នានា រវាង​គ្នា​ទៅវិញទៅមក។ ក្រោយពី​បាន​ចុះហត្ថលេខា​លើ​កំណត់ហេតុ​រួចមក ភាគី​ទាំងពីរ​កម្ពុជា កូរ៉េ បាន​ផ្លាស់ប្តូរ​មតិយោបល់ និង​បង្ហាញ​ពី​សក្តានុពល​ខេត្ត-ក្រុង រៀងៗខ្លួន ក្នុងការ​អភិវឌ្ឍ​លើ​វិស័យសេដ្ឋកិច្ច​ដើម្បី​ជា​ផលប្រយោជន៍​ទាំងសងខាង​នា​ថ្ងៃ​ខាងមុខ៕

សូមទស្សនាវីដេអូខាងក្រោម