នៅព្រឹកថ្ងៃទី០៣ ខែធ្នូ ឆ្នាំ២០១៨,នៅ​ទីស្ដីការ​ក្រសួងសេដ្ឋកិច្ច និង​ហិរញ្ញវត្ថុ, ឯកឧត្ដម​អគ្គ​បណ្ឌិត​សភា​ចារ្យ អូន ព័ន្ធមុនីរ័ត្ន ឧបនាយក​រដ្ឋមន្រ្តី រដ្ឋមន្ត្រី​ក្រសួងសេដ្ឋកិច្ច និងហិរញ្ញវត្ថុ បានទទួលជួបពិភាក្សាការងារ​ជាមួយ​​​លោកជំទាវ Angela Corcoran ឯកអគ្គរាជទូតអូស្រា្តលីប្រចាំនៅកម្ពុជា ដែលជំនួបពិភាក្សានេះផ្តោ​តជាសំខាន់​ទៅ​លើ​​កិច្ចសហប្រតិបត្តិការថ្មីរបស់់​ប្រទេស​អូស្រ្តា​លីសម្រាប់ឆ្នាំ២០១៩-២០២២ ​​ក្នុងការ​ពង្រឹងកិច្ចសហប្រតិបត្តិការ អភិវឌ្ឍន៍នៅ​​​កម្ពុជា ក៏ដូចជាការពង្រឹងតួនាទីរបស់​ប្រទេស​អូស្រ្តា​លីនៅក្នុងតំបន់ តាមរយៈកិច្ច​សហ​ប្រតិបត្តិ​ការ​សេដ្ឋកិច្ច និង​​ហិរញ្ញវត្ថុ​។នាឱកាសជំនួបនេះ  ឯកឧត្តមអគ្គបណ្ឌិតសភាចារ្យ  អូន ព័ន្ធមុនីរ័ត្ន បានគូសបញ្ជាក់ និងសម្តែង​នូវ​អំណរ​គុណ និង​​ការ​​កោតសរ​សើ​រចំពោះសមិទ្ធិផលនានាដែលភាគីមិត្តអូស្រ្តាលី​បានរួមចំណែកផ្តល់ការគាំទ្រក្នុង​ការ​អភិវឌ្ឍ​សង្គម និង​សេដ្ឋ​កិច្ច​តាមរយៈការផ្តល់ហិរញ្ញប្បទានឥតសំណងដល់កម្ពុជា ។  ឯកឧត្តមអគ្គបណ្ឌិតសភាចារ្យក៏បាន​គូស​រំលេចផងដែរថា កម្ពុជាតែងតែចាត់​ទុក​អូស្រ្តាលីជាដៃគូអភិវឌ្ឍន៍ដ៏សំខាន់មួយក្នុងតំបន់ ដែលបានរួម​ចំណែក​យ៉ាង​​សកម្មក្នុងកិច្ចដំណើរការនៃការកសា​ងសន្តិភាពនៅប្រទេសកម្ពុជា ​ការស្តារ និង​អភិវឌ្ឍន៍មកដល់​បច្ចុប្បន្ន។ ជាប្រសាសន៍តប ​ លោកជំទាវ  Angela Corcoran បានជម្រាបជូនឯកឧត្តមអគ្គបណ្ឌិតសភាចារ្យ​ថា, ​ប្រទេស​កម្ពុជាពិតជាមានការរីកចម្រើន និង ផ្លាស់ប្តូរគួរឲ្យកត់សម្គាល់ ហើយបានបញ្ជាក់បន្ថែមថា អូស្រ្តាលី​នឹង​ខិត​ខំ​​បន្តពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ ដោយតម្រង់វិស័យនៃកិច្ចសហប្រតិបត្តិការរប​ស់​អូស្រ្តាលីឲ្យស្របទៅនឹងយុទ្ធសាស្រ្តអភិវឌ្ឍន៏ជាតិរបស់កម្ពុជា។ នាឱកាសនោះ ភាគីទាំងពីរបានស្វាគមន៍ដល់គម្រោងកំពុងដំណើរការមួយចំនួនក្នុងក្របខ័ណ្ឌនៃកិច្ច សហប្រតិបត្តិការអភិវឌ្ឍរបស់អូស្រ្តាលីនៅកម្ពុជា មានដូចជា៖

១- វិស័យអភិបាលកិច្ច៖ កម្មវិធីកិច្ច​សហប្រតិបត្តិការ​កម្ពុជា-អូស្រ្តាលី ដើម្បីសេវាប្រកប​ដោយ​សមធម៏ ​និ​ង​និរន្តភាព “Aus​tra​lia​-Cambodia Cooperation for Equi​table Sustainable Services-ACCESS” ក្នុង​ទឹក​ប្រាក់ហិរញ្ញប្បទាន​ឥត​សំណងប្រមាណ ២៥លានដុល្លារអូស្រ្តាលី ​ដែលកម្មវិធីនេះមា​នទិស​ដៅ​ជារួម​​ក្នុងការ​ជួយ ដល់​ប្រជា​ពលរដ្ឋ​កម្ពុ​​ជា​​​ដែល​ងាយរង​គ្រោះ ដូចជា ជន​ពិការ និងស្រ្តីដែលរងគ្រោះដោយ​អំពើ​ហឹង្សាជា​ដើម​។

២- វិស័យហេដ្ឋារចនាសម្ព័ន្ធ៖ កម្មវិធីការវិនិយោ​គ​ក្នុង​វិស័យហេដ្ឋារចនាសម្ព័ន្ធ “Investing In Infra- struct​ur​e​​-3i”ក្នុងទឹកប្រាក់ហិរញ្ញប្បទាន​ឥត​សំណងប្រមាណ ៤៥,៤លានដុល្លារអូស្រ្តាលី ដែលកម្មវិធីនេះមា​ន​ទិស​ដៅ​ជារួម​​ក្នុងការការកសាង ឬ​ការ​ពង្រឹង​​បណ្តាញ​ចែក​ចាយនិង​ត​ភ្ជាប់​សម្រាប់ពង្រីកលទ្ធភាពផ្គត់ផ្គង់​ថាមពល​អគ្គិសនី និង​ទឹក​ស្អា​ត​នៅតាម​ទី​ប្រជុំ​ជន និងជនបទ ដើម្បីលើក​កម្ពស់​​ជីវភាពរស់នៅរបស់ប្រជាជន និងមាន​គោល​ដៅ​អភិវឌ្ឍ​ន៍​ផ្នែកឯកជនក្នុងស្រុក​សម្រាប់​ជំរុញអនុវត្តគោល​នយោបាយ​​​​​អភិវឌ្ឍន៍​វិស័យឧស្សាហកម្មកម្ពុជា ឆ្នាំ២០​១៥​-​២០២៥ ។ជាការឆ្លើយតប ឯកឧត្តមអគ្គបណ្ឌិតសភាចារ្យបានថ្លែងអំណរគុណជាថ្មីម្តងទៀតដល់​រាជរដ្ឋាភិបាល​អូស្រ្តាលី​ដែលតែងតែផ្តល់ការគាំទ្រដល់កម្ពុជា និងសន្យាបន្ត​កិច្ចសហប្រតិបត្តិការនេះឲ្យកាន់តែមានប្រសិទ្ធិភាព​ថែមទៀត ​ដើម្បី​ជា​ឧត្តម​ប្រយោជន៏​សម្រាប់ប្រទេស និងប្រជាជននៃប្រទេសទាំងពីរ ។