ដោយសារកត្តាស្ថានភាពអាកាសធាតុក្នុងរយៈពេលប៉ុន្មានថ្ងៃនេះ នៅព្រះរាជាណាចក្រកម្ពុជា ទទួលរងនូវឥទ្ធិពលព្យុះ និងភ្លៀង ជាបន្តបន្ទាប់ ក្នុងនោះខេត្តកំពតក៏បានទទួលរងនូវឥទ្ធិពលនៃបាតុភូតធម្មជាតិនេះដែរហើយបានបង្ករអោយមានភ្លៀងធ្លាក់ជាប់ៗគ្នា បណ្តាលអោយកើតមាននូវជំនន់ទឹកភ្លៀងនៅតាមភូមិសាស្ត្រស្រុកមួយចំនួនក្នុងខេត្តពិសេសក្នុងស្រុកទឹកឈូនិងក្រុងកំពត ។ ទឹកជំនន់នេះសោធន៍ក៏បានបង្កឡើងអោយមានផលប៉ះពាល់លើការរស់នៅនិងផលដំណាំរបស់ប្រជាពលរដ្ឋ ពិសេសបានបំផ្លិចបំផ្លាញធ្វើអោយខូចខាតនូវហេដ្ឋារចនាសម្ព័ន្ធជាច្រើនដែលជាបន្ទុកធ្ងន់ធ្ងរលើរាជរដ្ឋាភិបាលទទួលដោះស្រាយ។
ដោយឡែកសម្រាប់ស្រុកទឹកឈូក៏បានរងនូវការវាយប្រហារពីទឹកជំនន់នេះបានធ្វើអោយបាក់ទំនប់បង្ហៀរទឹកមួយកន្លែងនៃទំនប់ប្រទាក់ក្រឡាស្ថិតនៅក្នុងឃុំកូនសត្វកាលពីវេលាម៉ោង៥ជិតភ្លឺនាថ្ងៃទី ១១ ខែសីហា ឆ្នាំ ២០១៩ ។
ដោយផ្ដើមចេញពីទុក្ខកង្វល់ចំពោះសុខទុក្ខរបស់ប្រជាពលរដ្ឋជាចម្បងឯកឧត្តម ជឹង ផល្លា ប្រធានក្រុមប្រឹក្សាខេត្ត រួមនឹងមន្ត្រីជំនាញ អាជ្ញាធរមូលដ្ឋានក៏បាន ចុះពិនិត្យស្ថានភាពនៃការបាក់ទំនប់នេះដល់ទីកន្លែងជាក់ស្ដែងដោយផ្ទាល់។ ផ្អែកលើការតាមដានពិនិត្យយ៉ាងយកចិត្តទុកដាក់នៃទំហំបាក់ទំនប់កាន់តែធំឯកឧត្ដម ជឹង ផល្លា ប្រធានក្រុម ប្រឹក្សាខេត្ត ក៏បានណែនាំដល់មន្ត្រីនិងអាជ្ញាធរមូលដ្ឋានធ្វើការផ្សព្វផ្សាយដល់ប្រជាពលរដ្ឋដែលរស់នៅជិតទំនប់អោយមានការប្រុងប្រយ័ត្នខ្ពស់ ព្រមទាំងត្រៀមជម្លៀសប្រជាពលរដ្ឋ ទៅរកទីទួលសុវត្ថិភាពជាបន្ទាន់ផងដែរ។ ប៉ុន្តែ ទោះបីយ៉ាងណា ក្នុងឱកាសនោះដែរឯកឧត្ដម រដ្ឋមន្ត្រី ធនធានទឹកនិងឧតុនិយមលឹម គានហោក៏បានអញ្ជើញចុះមកដល់ជួយអន្តរាគមន៍ដឹកនាំបញ្ជាដោយផ្ទាល់ផងដែរ។
-សូមជំរាបបញ្ជាក់ថា៖តាមការអោយដឹងពីមន្ត្រីធនធានទឹកខេត្តទំនប់ប្រទាក់ក្រឡានេះមានទំហំ អាចស្តុកទឹកបានចំនួនប្រមាណ១០លានម៉ែត្រគូប ហេីយទំនប់នេះផ្តល់អត្ថប្រយោជន៍ជាតំបន់ទេសចរណ៍កំសាន្ត ជាអាងស្តុកទឹកសម្រាប់ប្រជាពលរដ្ឋប្រកបរបបរដាំដំណាំបន្លែបង្កាផ្សេងៗ ដេីម្បីបង្កេីនកំរិតជីវភាពក្នុងគ្រួសារ។ ចំណែកបញ្ហាចំពោះមុខនេះបើទំនប់នេះនៅតែបន្តបាក់ហូរទឹក រយៈពេលយូរអាចប្រឈមធ្វើអោយផលដំណាំនិងប្រជាពលរដ្ឋ​រងការប៉ះពាល់ចំនួនបីឃុំគឺឃុំកូនសត្វ ឃុំត្រពាំងព្រីងនិងឃុំត្រពាំងសង្កែក្នុងស្រុកទឹកឈូខេត្តកំពតនិងឃុំមួយចំនួនទៀតស្រុកដំណាក់ចង្អើខេត្តកែប។