បន្ទាយមានជ័យ៖ ចាប់តាំងចុងឆ្នាំ២០១៩-មកទល់ខែកុម្ភះ ឆ្នាំ២០២០នេះ សត្វស្លាបចម្រុះបានបន្តកើនឡើងនិងបង្ហាញវត្តមាននៅតាមវាលស្រែ បឹងបួរត្រពាំង អូរ ប្រឡាយនៅភូមិសាស្ត្រស្រុកភ្នំស្រុក ស្រុកព្រះនេត្រព្រះ ក្រុងសិរីសោភ័ណ ស្រុកអូរជ្រៅ មង្គលបូរីដោយគ្មានការភ័យខ្លាចហើយហិចហើរលើវេហារនិងចុះរកចំណីរលើទីតាំងដូចខាងលើ ដែលមើលទៅដូចទិដ្ឋភាពធម្មជាតិ។

តាមការអោយដឹងពីកសិករម្ចាស់ស្រែប្រាំងអោយដឹងថា ដីវាលស្រែនិងទីសាធារណៈមួយចំនួនតាំងពីរដូវវស្សា រដូវរំហើយមកទល់រដូវប្រាំងនេះ វត្តមានសត្វស្លាបគោក សត្វស្លាបទឹកបានចុះច្រើននៅតាមវាលស្រែដែលគេវ៉ៃដី ភ្ជួររាស់ធ្វើស្រែប្រាំង វាលស្រែដែលកំពុងលូតលាស ហើយស្រូវទុំនិងតាមវាលស្រែដែលច្រុូតកាត់ប្រមូលផលហើយ។

សត្វស្លាបខ្លះរកសុីតែក្តាមខ្យង សត្វល្អិតនិងគ្រាប់ស្មៅ ។តែសត្វខ្លះក៏ជាន់ស្រូវអោយខូចខាតដែរ។​កាលពីថ្ងៃទី១២​ខែកុម្ភះ យើងក៏បានឃើញសត្វស្លាបបង្ហាញវត្តមានដោយចុះរកសុិចំណីនិងហិចហើរប្រឡែងគ្នាទាំងហ្វូងៗ ទាំងនោះមានដូចជា ចង្កៀលខ្យង ក្រសារ ប្ររឹក ប្រវែក ក្អែកទឹក ក្អែកគោក ទុង ត្រយ៉ង ខ្វែក កុក ស្មោញ ចចាត ។ល។

កសិករនិងមន្ត្រីក្សេត្រសាស្ត្រអះអាងថា ៖ វត្តមានសត្វស្លាបច្រើន គួរសប្បាយចិត្ត ល្អមើល ហើយបង្ហាញថា មនុស្សនិងសត្វលែងចងគ្នាជាសត្រូវ លែងសូវមានការបរបាញ់ព្រានប្រម៉ង់។ ហើយតាមវាលស្រែស្រូវមានលក្ខណៈធម្មជាតិច្រើន មិនសូវមានសារជាតិគីមីឬថ្នាំពុលហួសប្រមាណដូចមុន ។

លោកវរសេនីយ៍យ៉ត សុផល អធិការនគរបាលស្រុកភ្នំស្រុកអោយដឹងថ្ងៃទី១២ខែកុម្ភៈថា ៖ ការយាយី ដាក់ថ្នាំនិងប្រមាញ់សត្វស្លាបត្រូវបានទប់ស្កាត់បង្ក្រាបបានស្ទើរទាំងស្រុង ។ជាពិសេស គឺពលរដ្ឋបានចូលរួមសហការឬអាចថា ពួកគាត់លែងបៀតបៀនសម្លាប់សត្វ ។

អាជ្ញាធរ មន្ត្រីបរិស្ថានតំបន់ការពារទេសភាពអាងត្រពាំងថ្មនិងសកម្មជនសត្វព្រៃអោយដឹងថា ៖ សត្វស្លាប់កម្រនិងសត្វស្លាប់ជិតផុតពូជមួយចំនួនពិសេសគឺសត្វក្រៀលក្បាលក្រហមដែលសំខានជាងគេ សត្វរនាលពណ័ រនាលប្រផេះ ក្ងរ ខ្សឹប ទាព្រៃ …និងសត្វល្មូន សត្វម្រឹគពិសេសរមាំង ឈ្លូស មិនសូវបង្ហាញវត្តមាននៅឡើយ៕