បន្ទាយមានជ័យ៖ឯកឧត្តម អ៊ុំ រាត្រី អភិបាលខេត្តបន្ទាយមានជ័យនៅព្រឹកថ្ងៃទី៥មេសា រួមជាមួយលោកអភិ​បាល គាត ហ៊ុល អភិបាលក្រុងប៉ោយប៉ែត មន្ត្រីពាក់ព័ន្ធ កងកម្លាំងប្រដាប់អាវុធ បានចុះពិនិត្យមើលតាមខ្នងផ្ទះបងប្អូនប្រជាពលរដ្ឋទទួលរងគ្រោះដោសារខ្យល់កន្ត្រាក់ នៅភូមិក្បាលស្ពាន១ និងភូមិសាមគ្គីមានជ័យ ក្នុងសង្កាត់ប៉ោយប៉ែត ក្រុងប៉ោយប៉ែត និងផ្សារ ចំនួន២ផ្សារ ក្នុងភូមិក្បាលស្ពាន១ បន្ទាប់ពីរងគ្រោះខ្យល់កន្ត្រាក់​រលំបើងដួលកាលពរសៀលថ្ងៃទី៤ មេសា ២០២១ ។

ដើម្បីជាការដោះស្រាយបន្ទាន់ ជូនដល់បងប្អូនប្រជាពលរដ្ឋ បានជាជម្រកផ្ទះសម្បែករស់នៅ ឯកឧត្តម  រាត្រីជាមួយក្រុមការងារក្រុង បានផ្តល់សង្ក័សី ជូនកងកម្លាំងទាំង៣ មានយោធា នគរបាល កងរាជអាវុធហត្ថ ប្រជាការពារ ដើម្បីរៀបចំជួសជុលឡើងវិញ លើផ្ទះខូចខាតធ្ងន់ស្រាល ចំនួន ១៩ខ្នងផ្ទះ អស់សង្ក័សី ចំនួន២១៧ សន្លឹក និងឈើមួយចំនួន។ ដោយឡែកផ្សារដែលបងប្អូនអាជីវករលក់ដូរ ខាងម្ចាស់ក្រុមហ៊ុនទាំង២ បាននឹងកំពុងជួសជុលរៀបចំឲ្យបានរឹងមាំឡើងវិញ។

ជាមួយគ្នានោះឯកឧត្តម អ៊ុំ រាត្រី អភិបាលខេត្តបន្ទាយមានជ័យសូមធ្វើការអំពាវនាវ បងប្អូនប្រជាពលរដ្ឋយើងទាំងអស់ សូមមានការប្រុងប្រយ័ត្នខ្ពស់ ព្រោះតាមការជូនដំណឹងរបស់ក្រសួងធនធានទឹក និងឧត្តុនិយម លើភូមិសាស្ត្រខេត្ត ទទួលរងបាតុភូមិសម្ពាធទាប បណ្តាលឲ្យមានភ្លៀងធ្លាក់ ខ្យល់ផ្គររន្ទះ ដូច្នេះត្រូវបង្កើនការប្រុងប្រយ័ត្នជាពិសេស សុវត្ថិភាព ខ្លួន កូនៗចៅៗ ឲ្យបានល្អ ដើម្បីបង្ករជៀសវាងគ្រោះជាយថាហេតុណាមួយកើតឡើង។ឯកឧត្តមក៍បានចូលរួមស្តាយចំពោះការបាត់បង់ ខូចខាតទ្រព្យសម្បត្តិបងប្អូនប្រជាពលរដ្ឋយើង ទាំងអស់គ្នា។